| Définition
|
Di kra n yisutal imawiyen (contextes oraux) n sin n yimesla, ttilint temliliyin ideg yiwen deg-sen yettbeddil udem i wayeḍ (s + z = z(z)) neɣ ideg di sin yid-sen ttbeddilen udem (d + t = tt, tts).
Deg usatel amenzu d yiwen n yimesli ara as-yeḍlun i wayeḍ udem seg wudmawen-ines am umedya n umyag gar talɣa taḥerfit d tin n usuddem : enz --- senz = zenz ; azzel --- sizzel = zizzel neɣ am umedya n umyag s talɣa n tibbawt : ad d-tas = ad das ; ur yečči ara = ur yečča ara, neɣ diɣen, deg umedya n tegzemt (isem + arbib) : inisi uḥric = inisu uḥric. Ittusemma, deg yimedyaten-agi, amzun akken imesli wis sin d ajɣam ara yejɣem imesli amezwaru. Zemren ad ilin sin n yimesl-agi deg yiwen wawal, akken zemren ad ilin deg sin n wawalen.
Deg usatel wis sin d sin n yimesla ara yemyekcamen wa deg wayeḍ. Tamsertit-nsen, tgellu-d s ubeddel-nsen di sin. Dayen i iḍerrun gar yifeggagen n uẓar deg wawal : tadgalt --- tadyalt = taǧǧalt ; tiskert = ticcert.
|
